¹ આને તે ફરી સભાસ્થાનમાં ગયો; ને ત્યાં એક માણસ હતો જેનો હાથ સુકાઇ ગએલો હતો.

² અને તે વિશ્રામવારે તેને સાજો કરશે કે નહિ, તે વિષે તેઓએ તેના પર નજર રાખી, એ માટે કે તેઓ તેના પર દોષ મુકે.

³ અને પેલા સુકાએલા હાથવાળા માણસને તે કહે છે કે, વચમાં ઉભો થા.

⁴ અને તે તેઓને કહે છે કે, વિશ્રામવારે સારૂ કરવું કે માઠું કરવું? જીવને બચાવવો કે મારી નાખવો, કયું ઉચિત છે? પણ તેઓ છાના રહ્યા.

⁵ અને તેઓના હૃદયની કઠણતાને લીધે તે દલગીર થઈને ગુસ્સાસહિત ચોતરફ તેઓ ભણી જોઇને તે માણસને કહે છે કે, તારો હાથ લાંબો કર. અને તેણે લાંબો કર્યો; અને તેનો હાથ સાજો થયો.

⁶ અને શી રીતે તેનો નાશ કરવો તે વિષે ફરોશીઓએ બહાર જઈને તરત હેરોદીઓને સાથે તેની વિરુદ્ધ મનસુબો કર્યો.

⁷ અને ઇસુ પોતાના શિષ્યો સુદ્ધાં નીકળીને સમુદ્રની પાસે ગયો;

⁸ અને ગાલીલ્માંથી ઘણા લોક તેની પાછળ ગયા, અને યહુદાહમાંથી તથા યારૂશાલેમમાંથી તથા અદુમમાંથી તથા યરદનને પેલે પારથી તથા સૂર તથા સીદોનની આસપાસના ઘણા લોક તેણે જે જે [કાર્યો] કર્યા તે સાંભળીને તેની પાસે આવ્યા.

⁹ અને લોકથી તે દબાય નહિ, માટે તેણે ભીડના કારણથી પોતાને સારૂ હોડી તૈયાર રાખવાનું પોતાના શિષ્યોને કહ્યું;

¹⁰ કેમકે તેણે ઘણાંને સાજાં કર્યા હતા, અને તેથી જેટલાં માંદા હતાં તેટલાં તેને અડકવા સારૂ તેના પર તુટી પડતાં હતાં.

¹¹ અને અશુદ્ધ આત્માઓએ જયારે તેણે જોયો ત્યારે તેઓ તેને પગે પડ્યા તથા પોકારીને બોલ્યા કે, તું દેવનો દીકરો છે.

¹² અને તેણે તેઓને બહુ તાકીદ કરી કે, મને પ્રગટ ન કરો.

¹³ અને તે પહાડ પર ચઢ્યો, ને જેઓને તેણે પસંદ કર્યા તેઓને તેણે તેડ્યા; ને તેઓ તેની પાસે આવ્યા.

¹⁴ અને તેણે બારને ઠરાવ્યા એ માટે કે તેઓ તેની સાથે રહે, અને તે તેમને ઉપદેશ કરવા મોકલે,

¹⁵ તથા અધિકાર પામીને તેઓ ભૂતો કાઢે.

¹⁶ અને સીમોનની અટક તેણે પીતર પાડી;

¹⁷ તથા ઝબદીનો દીકરો યાકુબ તથા યાકુબનો ભાઇ યોહાન એઓની અટક તેણે બોઅનેરગેસ પાડી, એટલે ગર્જનાના દીકરા;

¹⁸ ને આંદ્રયા તથા ફીલીપ તથા બારથલમી તથા માત્થી તથા થોમા તથા આલફીનો દીકરો યાકુબ તથા થાદી તથા સીમોન કનાની,

¹⁹ તથા તેને પરસ્વાધીન કરનાર યહુદા ઇસ્કારયત; એ બારને તેણે ઠરાવ્યા. અને તે એક ઘરમાં આવે છે.

²⁰ અને ફરી એટલે ઘણા લોક એકઠા થયા કે તેઓ રોટલી પણ ખાઇ ન શક્યા.

²¹ અને ટી સગાંઓ તે સાંભળીને તેને પકડવા બહાર નિકળ્યાં; કેમકે તેઓએ કહ્યું કે તે ઘેલો છે.

²² અને જે શાસ્ત્રીઓ યારુશાલેમથી આવ્યા હતા તેઓએ કહ્યું કે, તેની સાથે બાલઝબુલ છે, ને ભૂતોના સરદાર[ની મદદ]થી તે ભૂતોને કાઢે છે.

²³ અને તેણે તેઓને પાસે તેડીને દૃષ્ટાંતોમાં તેઓને કહ્યું કે, શેતાન શેતાનને કેમ કાઢી શકે?

²⁴ ને જો કોઈ રાજ્યમાં માહોમાંહે ફૂટ પડી હોય, તો તે રાજ્ય સ્થિર રહી શકતું નથી.

²⁵ અને જો કોઈ ઘરમાં માહોમાંહે ફૂટ પડી હોય, તો તે ઘર સ્થિર રહી શકશે નહિ.

²⁶ અને જો શેતાન પોતાની સામો ઉભો થયો હોય, ને પોતામાં ફૂટ પડી હોય, તો તે નભી શકતો નથી; પણ તેનો અંત આવ્યો.

²⁷ બળવાનના ઘરમાં પેસીને જો કોઇ પહેલાં તે બળવાનને ન બાંધે તો તે તેનો સામાન લૂટી શકતો નથી; [તેને બાંધશે] ત્યાર પછી તેનું ઘર લૂટશે.

²⁸ હું તમને ખચિત કહું છું કે, માણસોના દીકરાઓને સર્વ અપરાધોની તથા જે જે દુર્ભાષણો તેઓ કરે તેમની માફી મળશે.

²⁹ પન્ન જે કોઈ પવિત્ર આત્મા વિરુદ્ધ દુર્ભાષણ કરશે, તેને માફી કદી મળશે નહિ; પણ તેને માથે અનંત કાળના પાપનો દોષ રહે છે.

³⁰ કેમકે તેઓ કહેતા હતા કે તેને અશુદ્ધ આત્મા વળગેલો છે.

³¹ ત્યારે તેના ભાઈઓ તથા તેની માં આવ્યાં, ને બહાર ઉભાં રહીને તેને બોલાવવા તેની પાસે માણસ મોકલ્યું.

³² અને ઘણા લોક તેની આસપાસ બેઠેલા હતા; ને તેઓએ તેણે કહ્યું કે, જો, તારી મા તથા તારા ભાઈઓ બહાર છે ને તને શીધે છે.

³³ અને તેણે તેઓને ઉત્તર આપતાં કહ્યું કે, મારી મા તથા મારા ભાઈઓ કોણ છે?

³⁴ અને જેઓ તેની આસપાસ બેઠા હતા તેઓ ભણી ચોતરફ જોઇને તે કહે છે કે , જુઓ, મારી મા તથા મારા ભાઈઓ.

³⁵ કેમકે જે કોઈ દેવની ઈચ્છા પ્રમાણે કરશે તે મારો ભાઇ તથા મારી બહેન તથા મા છે.