¹ અને કેટલાએક દિવસ પછી, તે ફરી કાપરનાહુમમાં ગયો, ત્યારે એવી ચરચા ફેલાઇ કે તે ઘરમાં છે.

² અને એટલા બધા એકઠાં થયા કે, દરવાજા પાસે પણ જગ્યા નહોતી; ને તે તેઓને વાત સંભળાવતો હતો.

³ અને તેઓ ચાર માણસોએ ઉંચકેલા એક પક્ષઘાતીને તેની પાસે લાવ્યા.

⁴ અને ભીડને લીધે તેઓ તેની પાસે આવી ન શક્યા, ત્યારે જ્યાં તે હતો ત્યાનું છાપરું તેઓએ ઉકેલ્યું, ને તે તોડીને જે ખાટલા પર તે પક્ષઘાતીને સુતો હતો તેને ઉતાર્યો.

⁵ અને ઇસુ તેઓનો વિશ્વાસ જોઇને પક્ષઘાતીને કહે છે કે, દીકરા, તારાં પાપ માફ થયાં છે.

⁶ પણ કેટલાએક શાસ્ત્રીઓ જેઓ ત્યાં બેઠાં હતા, તેઓ પોતાના હ્રદયોમાં વિચારતા હતા કે,

⁷ આ માણસ આવી રેતે કેમ બોલે છે? એ તો દુર્ભાષણ કરે છે. એક, એટલે દેવ, તે વિના કોણ પાપની માફી કરી શકે?

⁸ અને તેઓ પોતાના મનમાં એમ વિચારે છે, એ ઇસુએ પોતાના આત્મામાં એમ જાણીને તેઓને કહ્યું કે, તમે તમારાં હૃદયોમાં એવા વિચાર કેમ કરો છો?

⁹ એ બેમાનું વધારે સહેલું કયું છે, પક્ષઘાતીને એ કહેવું, કે તારા પાપ તને માફ થયાં છે, અથવા એ કહેવું કે, ઉઠ ને તારો ખાટલો ઉંચકીને ચાલ?

¹⁰ પણ માણસના દીકરાને પૃથ્વી પર પાપ માફ કરવાનો અધિકાર છે, એમ તમે જાણો માટે, {પક્ષઘાતીને તે કહે છે)

¹¹ હું તને કહું છું કે ઉઠ, તારો ખાટલો ઉંચકીને તારે ઘેર ચાલ્યો જા.

¹² અને તે ઉઠ્યો, ને તરત ખાટલો ઉંચકીને સહુના દેખતાં ચાલ્યો ગયો; આથી સહુએ અચરતી પામીને તથા દેવને મહિમા આપીને કહ્યું કે, અમે કદી આવું જોયું નથી.

¹³ અને ફરી તે સમુદ્રને કાંઠે ગયો; ને બધા લોક તેની પાસે આવ્યા; ને તેણે તેઓને બોધ કર્યો.

¹⁴ અને રસ્તે જતાં તેણે આલ્ફીના દીકરા લેવીને દાણની ચોકી પર બેઠેલો જોયો; ને તેને કહે છે કે, મારી પાછળ ચાલ; ને તે ઉઠીને તેની પાછળ ચાલ્યો.

¹⁵ અને એમ થયું કે તે એના ઘરમાં જમવા બેઠો, ને ઘણા દાણીઓ તથા પાપીઓ ઈસુની તથા તેના શિષ્યોની સાથે બેઠા, કેમકે તેઓ ઘણા હતા, ને તેની પાછળ ચાલતાં હતા.

¹⁶ અને શાસ્ત્રીઓએ તથા ફરોશીઓએ તેને દાણીઓની તથા પાપીઓની જોડે જમતો જોઇને તેના શિષ્યોને કહ્યું કે, તે તો દાણીઓની તથા પાપીઓની જોડે ખાય પીએ છે.

¹⁷ અને ઇસુ એ સાંભળીને તેઓને કહે છે કે, જેઓ સાજા છે તેઓને વૈદની અગત્ય નથી; પણ જેઓ માંદા તેઓને છે. હું ન્યાયીઓને નહિ, પણ પાપીઓને તેડવા આવ્યો છું.

¹⁸ અને યોહાનના તથા ફરોશીઓના શિષ્યો ઉપવાસ કરતાં હતા; ને તેઓ આવીને તેને કહે છે કે, યોહાનના તથા ફરોશીઓના શિષ્યો ઉપવાસ કરે છે, પણ તારા શિષ્યો ઉપવાસ નથી કરતા, એનું શું કારણ? ને ઇસુએ તેઓને કહ્યું કે,

¹⁹ વાર જાનૈયાની સાથે હોય, ત્યાં સુધી શું તેઓ ઉપવાસ કરી શકે? વાર તેઓની સાથે છે તેટલા વખત સુધી તેઓ ઉપવાસ કરી શકતા નથી.

²⁰ પણ એવા દિવસ આવશે કે જયારે વાર તેઓની પાસેથી લઇ લેવાશે, ત્યારે તે દિવસે તેઓ ઉપવાસ કરશે.

²¹ અને કોરા લુગડાનું થિગડું જુની વસ્ત્રને કોઈ દેતું નથી; જો દે તો નવું જોડેલું જુનાને સાંઘવાને બદલે ખેંચી કાઢે છે, ને ફાટ વધતી પડે છે.

²² અને નવો દ્રાક્ષરસ જુની મસકોમાં કોઈ ભરતું નથી; જો ભરે તો નવો દ્રાક્ષરસ મસકોને ફાડી નાખે છે, ને દ્રાક્ષરસ તથા મસકો એ બન્નેનો નાશ થાય છે; પણ નવો દ્રાક્ષરસ નવી મસકોમાં [ભરે છે].

²³ અને એમ થયું કે વિશ્રામવારે તે દાણાનાં ખેતરોમાં થઈને જતો હતો; ને તેના શિષ્યો ચાલતાં ચાલતાં કણસલાં તોડવા લાગ્યા.

²⁴ અને ફરોશીઓએ તેને કહ્યું કે, જો, વિશ્રામવારે જે ઉચિત નથી તે તેઓ કેમ કરે છે?

²⁵ ને તેણે તેઓને કહ્યું કે, દાઉદને અગત્ય હતી, ને તે તથા તેના સાથીઓ ભુખ્યા હતા, ત્યારે તેણે શું કર્યું, એ તમે કદી નથી વાંચ્યું?

²⁶ એટલે કે અબ્યાથાર મુખ્ય યાજક હતો, ત્યારે દેવના ઘરમાં પેસીને, અર્પેલી રોટલીઓ જે યાજકો શિવાય કોઈને ખાવાને ઉચિત નથી તે તેણે ખાધી, ને તેના સાથીઓને પણ આપી.

²⁷ અને તેણે તેઓને કહ્યું કે, વિશ્રામવાર માણસને અર્થે થયો, માણસ વિશ્રામવારને અર્થે નહિ;

²⁸ માટે માણસનો દીકરો વિશ્રામવારનો પણ પ્રભુ છે.