¹ દેવના દીકરા ઇસુ ખ્રીસ્તની સુવાર્ત્તાનો આરંભ;

² જેમ યશાયાહ ભવિષ્યવાદી[ના પુસ્તક]માં લખેલું છે કે, જો, હું તારી આગળ મારા દૂતને મોકલું છું; તે તારી આગળ તારો માર્ગ તૈયાર કરશે;

³ રાનમાં પોકારનારની એવી વાણી કે પ્રભુનો માર્ગ તૈયાર કરો, તેના રસ્તા સીધા કરો;

⁴ તેમ યોહાન રાનમાં બાપ્તિસ્મા કરતો, તથા પાપોની માફીને સારૂ, પસ્તાવાનું બાપ્તિસ્મા પ્રસિદ્ધ કરતો હતો.

⁵ અને અખા યહુદાહ દેશના તથા યરુશાલેમના રહેવાસીઓ તેની પાસે ગયા; ને બધા પોતાનાં પાપ કબૂલ કરીને યરદન નદીમાં તેનાથી બાપ્તિસ્મા પામ્યા.

⁶ અને યોહાનનો પોશાક ઉંટના રૂઆંનો હતો, ને તેની કમરે ચામડાનો પટો હતો; ને તે ટીડો તથા રાની મધ ખાતો હતો.

⁷ અને તેણે એવું પ્રગટ કીધું કે, મારા કરતાં જે સમર્થ તે મારી પાછળ આવે છે; તેના ચંપલની વાઘરી હું વાંકો વળીને છોડવા યોગ્ય નથી.

⁸ મેં પાણીથી તમારું બાપ્તિસ્મા કીધું છે ખરું; પણ તે પવિત્ર આત્માથી તમારું બાપ્તિસ્મા કરશે.

⁹ અને તે દહાડાઓમાં એમ થયું કે, ઇસુ ગાલીલના નાઝારેથથી આવ્યો, ને યરદનમાં યોહાનથી બાપ્તિસ્મા પામ્યો;

¹⁰ ને તરત પાણી પાસેથી ઉપર આવતાં તેણે આકાશ ઉઘડેલું તથા પવિત્ર આત્માને કબુતરની પેઠે પોતા પર ઉતરતો જોયો.

¹¹ અને આકાશથી વાણી થઇ કે, તું મારો વહાલો દીકરો છે, તારા પર હું પ્રસન્ન છું.

¹² અને તરત આત્મા તેને રાનમાં લઇ જાય છે;

¹³ ને રાનમાં ચાળીસ દહાડા સુધી શેતાનથી તેનું પરીક્ષણ થયું; ને જંગલી પશુઓની સાથે તે હતો; ને દૂતોએ તેની સેવા કીધી.

¹⁴ અને યોહાન પરસ્વાધીન કરાયા પછી ઇસુ ગાલીલમાં આવ્યો, ને દેવની સુવાર્ત્તા પ્રગટ કરતાં તેણે કહ્યું કે,

¹⁵ સમય પુરો થયો છે, ને દેવનું રાજ્ય પાસે આવ્યું છે; પસ્તાવો કરો, ને સુવાર્ત્તા પર વિશ્વાસ કરો.

¹⁶ અને તેણે ગાલીલના સમુદ્રને કાંઠે ચાલતાં સીમોન તથા તેના ભાઇ આંદ્રયાને સમુદ્રમાં જાળ નાખતા જોયાં; કેમકે તેઓ માછલા પકડનારા હતા.

¹⁷ અને ઇસુએ તેઓન કહ્યું કે, મારી પાછળ આવો, ને હું તમને માણસો પકડનારા કરીશ.

¹⁸ આને તરત તેઓ પોતાના જાળો મુકીને તેની સાથે ગયા.

¹⁹ અને ત્યાંથી થોડું આગળ જતાં તેણે ઝબદીના દીકરા યાકુબને તથા તેના ભાઇ યોહાનને વહાણમાં જાળો સાંધતા જોયાં.

²⁰ અને તરત તેણે તેઓને બોલાવ્યા; અને તેઓ પોતાના બાપ ઝબદીને નોકરોની સાથે વહાણમાં મુકીને તેની પાછળ ગયા.

²¹ અને તેઓ કાપરનાહુમમાં ગયા; ને તરત, વિશ્રામવારે સભાસ્થાનમાં જઈને તેણે ઉપદેશ કર્યા.

²² અને તેઓ તેના ઉપદેશથી અચરત થયા; કેમકે તેણે તેઓને શાસ્ત્રીઓની પેઠે નહિ, પણ જેને અધિકાર હોય છે તેની પેઠે ઉપદેશ કીધો.

²³ અને તત્કાળ તેઓના સભાસ્થાનમાં અશુદ્ધ આત્મા વળગેલો એક માણસ માલમ પડ્યો; ને તેણે બૂમ પાડીને કહ્યું કે,

²⁴ અરે, ઇસુ નાઝારી, અમારે ને તારે શું છે? શું તું અમારો નાશ કરવા આવ્યો છે? તું કોણ છે, એ હું જાણું છું, એટલે દેવનો પવિત્ર.

²⁵ અને ઇસુએ તેને ધમકાવતા કહ્યું કે, છાનો રહે, ને એમાંથી નીકળી જા.

²⁶ અને અશુદ્ધ આત્મા તેને મરડી નાખીને તથા મોટી બૂમ પાડીને તેનામાંથી નીકળી ગયો.

²⁷ અને બધા એવા અચરત થયા કે તેઓ માહોમાંહે પુછવા લાગ્યા કે, આ શું છે? આ તો નવો ઉપદેશ છે! કેમકે અધિકારથી તે અશુદ્ધ આતામાઓને પણ આજ્ઞા કરે છે, ને તેઓ તેનું માને છે.

²⁸ અને તરત તેની કીર્તિ અખા ગાલીલ પ્રાંતમાં ફેલાઇ ગઇ.

²⁹ અને તેઓ સભાસ્થાનમાંથી નીકળીને યાકુબ તથા યોહાન સુદ્ધાં તરત સીમોન તથા આંદ્રયાના ઘરમાં ગયા.

³⁰ હવે સીમોનની સાસુ તાવે પડેલી હતી; ને તરત તેને વિષે તેઓએ તેને કહ્યું.

³¹ અને તેણે પાસે આવીને એનો હાથ ઝાલીને એને ઉઠાડી; ને તરત તેનો તાવ મટી ગયો; ને એણીએ તેઓની સેવા કીધી.

³² અને સાંજે સુરજ આથમ્યો ત્યારે તેઓ બધાં માંદાઓને તથા ભૂતવળગેલાંઓને તેની પાસે લાવ્યા.

³³ અને બારણા આગળ આખું શહેર એકઠું થયું.

³⁴ અને ઘણાં જેઓ નાના પ્રકારના રોગથી પીડાતાં હતાં તેઓને તેણે સાજાં કીધાં; ને ઘણાં ભૂતોને કાઢ્યાં; ને ભૂતો તેને ઓળખતા હતાં માટે તેણે તેઓને બોલવા ન દીધાં.

³⁵ અને સવારે પો ફાટતાં પહેલાં ગણો વહેલો ઉઠીને તે બહાર ગયો; ને ઉજડ ઠેકાણે જઈને તેણે ત્યાં પ્રાર્થના કરી.

³⁶ અને સીમોન તથા જેઓ તેની સાથે હતા, તેઓ તેની પછવાડે ગયા;

³⁷ અને તેઓ તેને મળીને કહે છે કે, સહુ તને શીધે છે.

³⁸ અને તે તેઓને કહે છે કે, આપણે પાસેના ગામોમાં જઈને, કે હું ત્યાં પણ ઉપદેશ કરું; કેમકે એજ માટે હું આવ્યો છું.

³⁹ અને આખા ગાલીલમાં તેઓના સભાસ્થાનોમાં જઈને તે ઉપદેશ કરતો ને ભૂતો કાઢતો હતો.

⁴⁰ અને એક કોઢિયો તેની પાસે આવે છે, ને તેણે વિનંતી કરીને તથા ઘૂંટણ ટેકીને કહે છે કે, જો તારી ઈચ્છા હોય તો તું મને શુદ્ધ કરી શકે છે.

⁴¹ અને ઈસુને દયા આવી, ને તે હાથ લાંબો કરીને તેને અડક્યો, ને કહે છે કે, મારી ઈચ્છા છે, તું શુદ્ધ થા;

⁴² ને તરત તેનો કોઢ ગયો, ને તે શુદ્ધ થયો.

⁴³ અને તેણે તેને સખત તાકીદ કરીને તરત બહાર મોકલ્યો;

⁴⁴ ને તેને કહે છે કે, જોજે, કોઈને કંઈ કહેતો ના; પણ જઈને પોતાને યાજકને દેખાડ, અને જે જે મુસાએ ફરમાવ્યું તે તેનું, તારા શુદ્ધિકરણને લીધે, તેઓને માટે સાક્ષી તરીકે, અર્પણ કર.

⁴⁵ પણ તે નીકળીને તે વાત એટલી બધી પ્રગટ કરવા તથા ફેલાવવા લાગ્યો, કે ઇસુ ફરી શહેરમાં ઉઘાડી રીતે જઈ ન શક્યો, પણ બહાર ઉજડ જગ્યાઓમાં રહ્યો, ને લોક ચોમેરથી તેની પાસે આવ્યા.