¹ અને વિશ્રામવારની આખરે, અઠવાડીઆને પહેલે દહાડે પોહ ફાટવા લાગ્યો, ત્યારે મરિયમ માગદાલેણ તથા બીજી મરિયમ કબરને જોવા આવી.

² અને જુઓ, મોટો ધરતીકંપારા થયો, કેમકે પ્રભુનો દૂત આકાશથી ઉતાર્યો, ને પાસે આવીને કબરના મ્હો પરથી પત્થરને ગબડાવીને તે પર બેઠો.

³ તેનું રૂપ વિજળી જેવું, ને તેનું લુગડું બરફના જેવું ઉજળું હતું.

⁴ અને તેના ધાકથી ચોકીદારો ધ્રુજ્યા ને મરણતોલ થઇ ગયા.

⁵ ત્યારે દૂતે ઉત્તર દેતાં તે બાયડીઓને કહ્યું, તમે બીહો મા, કેમકે વધસ્તંભે જડાએલા ઇસુને તમે શોધો છો, એ હું જાણું છું.

⁶ તે અહીં નથી, કેમકે તેણે જેમ કહ્યું હતું તેમ તે ઉઠ્યો છે, તમે આવો, જ્યાં પ્રભુ સૂતો હતો તે જગ્યા જુઓ.

⁷ અને વહેલા જઈને તેના શિષ્યોને કહો કે, મુએલાંઓમાંથી તે ઉઠ્યો છે. અને જુઓ, તે તમારા અગાઉ ગાલીલમાં જાય છે, ત્યાં તમે તેને દેખશો; જુઓ મેં તમને કહ્યું છે.

⁸ ત્યારે તેઓ બીક તથા ઘણા હરક સહિત, કબરની પાસેથી વહેલી નીકળીને તેના શિષ્યોને ખબર આપવાને દોડી.

⁹ અને જુઓ, ઇસુએ તેઓને મળીને કહ્યું કે, કુશળતા, ત્યારે તેઓએ પાસે આવીને તેના પગ પકડ્યા, ને તેનું ભજન કીધું.

¹⁰ ત્યારે ઇસુ તેઓને કહે છે, બીહો મા, જાઓ, મારા ભાઈઓને કહો કે, તેઓ ગાલીલમાં જાય, ને ત્યાં તેઓ મને દેખશે.

¹¹ અને તેઓ જતી હતી, ત્યારે જુઓ, ચોકીદારોમાંનો કેટલાએકે નગરમાં જઈને જે જે થયું તે સઘળું મુખ્ય યાજકોને કહ્યું.

¹² ત્યારે તેઓએ વડીલો સુદ્ધાં એકઠા થઈને મનસુબો કરીને, તે સિપાઈઓને ઘણાં નાણા આપીને

¹³ કહ્યું કે, તમે એમ કહો કે, અમે ઉંઘતા હતા ત્યારે તેના શિષ્યો રાત્રે આવીને તેને ચોરી ગયા.

¹⁴ અને જો એ વાત હાકેમને કાને પહોંચશે, તો અમે તેને સમજાવીને તમને બચાવીશું.

¹⁵ પછી તેઓએ નાણા લીધાં, ને શિખવ્યા પ્રમાણે કીધું; ને એ વાત યહુદીઓમાં આજ સુધી ચાલે છે.

¹⁶ પણ અગીઆર શિષ્યો ગાલીલમાં એક પહાડ પર જ્યાં ઇસુએ તેઓને [જવાનું] ઠરાવ્યું હતું, ત્યાં ગયા.

¹⁷ અને તેઓએ તેને જોઇને તેનું ભજન કીધું, પણ કેટલાએકને સંદેહ આવ્યો.

¹⁸ ત્યારે ઇસુએ પાસે આવીને તેઓને કહ્યું કે, આકાશમાં તથા પૃથ્વી પર સર્વ અધિકાર મને અપાયો છે.

¹⁹ એ માટે તમે જઈને સર્વ દેશનાઓને શિષ્ય કરો; બાપ તથા દીકરા તથા પવિત્ર આત્માને નામે તેઓને બાપ્તિસ્મા આપતાં જાઓ.

²⁰ મેં તમને જે જે આજ્ઞા કીધી તે સર્વ પાળવાનું તેઓને શિખવતા જાઓ; ને જુઓ, જગતના અંત સુધી હું સર્વકાળ તમારી સાથે છું.