¹ આને વિશ્રામવાર વિતી ગયા પછી મરિયમ માગદાલેણ તથા યાકુબની મા મરિયમ તથા સાલોમે, એઓએ સુગંધી વસ્તુઓ વેચાતી લીધી, એ માટે કે તેઓ આવીને તેને ચોળે.

² અને અઠવાડિયાને પહેલે દહાડે મોટે પરોઢીએ, સુરજ ઉગતે, તેઓ કબરે આવે છે.

³ અને તેઓ મહોમાંહે કહેતી હતી કે, આપણે વાસ્તે કબરના મ્હો આગળથી પત્થર કોણ ગબડાવશે.

⁴ અને તેઓ નજર ઉંચી કરીને જુએ છે કે, પત્થર ગબડી ગયો છે; કેમકે તે બહુ મોટો હતો.

⁵ અને તેઓએ કબરમાં પેસીને સફેદ જામો પહેરેલા, જમણી તરફ બેઠેલા, એક જુવાન માણસને જોયો, ને તેઓ અચરત થઇ.

⁶ પણ તે તેઓને કહે છે કે, અચરત ન થાઓ; વધસ્તંભે જડાયલા ઇસુ નાઝારીને તમે શોધો છે; તે ઉઠ્યો છે; તે અહીં નથી; જુઓ, જે જગ્યાએ તેને મુક્યા હતો તે આ છે.

⁷ પણ તમે જાઓ, તેના શિષ્યોને તથા પીતરને કહો કે, તે તમારી આગળ ગાલીલમાં જાય છે, જેમ તેણે તમને કહ્યું તેમ તમે ત્યાં તેને જોશો.

⁸ અને તેઓ બહાર નીકળીને કબરની પાસેથી દોડી ગઇ; કેમકે તેઓને ધ્રુજરી તથા અચંબો લાગ્યાં હતાં; ને તેઓએ કોઈને કંઈ કહ્યું નહિ; કેમકે તેઓ બીધી હતી.

⁹ હવે અઠવાડિયાના પહેલાં દહાડાને પ્રભાતે તે પાછો ઉઠને મરિયમ માગદાલેણ, જેનામાંથી તેણે સાત ભૂત કાઢ્યાં હતાં. તેને તે પહેલાં દેખાયો.

¹⁰ જેઓ તેની સાથે રહેલા હતા, તેઓ શોક તથા રૂદન કરતાં હતા, ત્યારે તેણીએ તેઓની પાસે જઈને ખબર આપી.

¹¹ અને તે જીવતો છે, ને તેણીના જોવામાં આવ્યો છે, એ સાંભળીને તેઓએ માન્યું નહિ.

¹² અને એ પછી તેઓમાંના બે જણ ચાલતા ગામડે જતાં હતા, એટલામાં તે બીજા રૂપમાં તેઓને દેખાયો.

¹³ અને તેઓએ જઈને બાકી રહેલાઓને કહ્યું, ને તેઓએ પણ તેઓનું માન્યું નહિ.

¹⁴ અને ત્યાર પછી અગિયાર જમવા બેઠા હતા, ત્યારે તે તેઓને દેખાયો; ને તેણે તેઓના અવિશ્વાસ તથા હૃદયની કઠણતાને લીધે તેઓને ઠપકો દીધો; કેમકે તે પાછો ઉઠ્યા પછી જેઓએ તેને જોયો હતો, તેઓનું તેઓએ માન્યું ન હતું.

¹⁵ અને તેણે તેઓને કહ્યું કે, આખા જગતમાં જઈને આખી સૃષ્ટિને સુવાર્ત્તા પ્રગટ કરો.

¹⁶ જે વિશ્વાસ કરે છે તથા બાપ્તિસ્મા લે છે, તે તારણ પામશે; પણ જે વિશ્વાસ નહિ કરે, તે અપરાધી ઠરશે.

¹⁷ અને વિશ્વાસ રાખનારાઓની સંઘાતે આ ચમત્કારો થશે; મારે નામે તેઓ ભૂતો કાઢશે, નવી બોલીઓ બોલશે,

¹⁸ સર્પોને ઉઠાવી લેશે, ને જો તેઓ કંઈ ઘાતક વસ્તુ પીએ, તો તેઓને કંઈ ઇજા થશે નહિ; તેઓ માંદાઓ પર હાથ મુકશે, ને તેઓ સાજા થશે.

¹⁹ ત્યારે પ્રભુ ઇસુ તેઓની સાથે બોલી રહ્યા પછી આકાશમાં લેવાયો, ને દેવને જમણે હાથે બેઠો.

²⁰ અને તેઓએ ત્યાંથી જઇને બધે ઠેકાણે સુવાર્ત્તા પ્રગટ કીધી; અને પ્રભુ તેઓના કામમાં તેઓને સહાય આપતો, ને સંઘાતે થએલા ચમત્કારોથી સુવાર્ત્તા [ની સત્યતા] સાબિત કરતો હતો. આમેન.