¹ હવે જે પ્રેરીતો તથા ભાઈઓ યહુદાહમાં હતા તેઓએ સાંભળ્યું કે, વિદેશીઓએ પણ દેવની વાતનો અંગીકાર કીધો છે.

² અને પીતર યરુશાલેમ આવ્યો, ત્યારે સુનતીઓએ તેની સાથે વાદ કરતા કહ્યું કે,

³ તે બેસુનતીઓના ઘરમાં જઈને તેઓની સાથે ખાધું.

⁴ ત્યારે પીતર વાત કરવા લાગ્યો ને તેઓને વિગતવાર ખુલાસો કરતા કહ્યું કે,

⁵ હું જોપ્પાં શહેરમાં પ્રાથના કરતો હતો, ત્યારે મને મૂર્છા આવી, ને મેં દર્શનમાં એક વાસણ, જાણે કે એક મોટી ચાદર તેના ચાર ખુણાથી લટકાવેલી હોય તેવું આકાશમાંથી ઉતરતું જોયું; ને તે મારી પાસે આવ્યું.

⁶ તેના પર એકી નજરે જોઇને મેં ધ્યાન આપ્યું, to પૃથ્વી પરનાં ચોપગાં પ્રાણીઓ તથા રાની પશુઓ તથા પેટે ચાલનારા પ્રાણીઓ, તથા આકાશનાં પક્ષીઓ મેં દીઠાં.

⁷ અને વળી મેં એક વાણી મને એમ કહેતી સાંભળી કે, પીતર, ઉઠ, મારીને ખા.

⁸ પણ મેં કહ્યું, પ્રભુ, એમ નહિ, કેમકે કોઈ પણ નાપાક અથવા અશુદ્ધ વસ્તુ મારા મ્હોમાં કદી પેઠી નથી.

⁹ પણ તેના ઉત્તરમાં આકાશમાંથી બીજી વાર વાણી થઇ કે, દેવે જે શુદ્ધ કીધું છે, તેને તું નાપાક ન ગણ.

¹⁰ અને એમ ત્રણ વાર થયું; પછી બધા આકાશમાં ખેંચી લેવામાં આવ્યાં.

¹¹ અને જુઓ, તેજ વેળાએ કાઈસારીઆથી મારી મોકલેલા ત્રણ માણસો જે ઘરમાં મે હતા તેની આગળ આવી ઉભા.

¹² અને આત્માએ મને કહ્યું કે, કંઈ પણ ભેદ રાખ્યા વિના તેઓની સાથે જા.અને આ છ ભાઈ પણ મારી સાથે આવ્યા; ને અમે તે માણસના ઘરમાં ગયાં;

¹³ ત્યારે તેણે અમને ખબર આપી કે મેં મારા ઘરમાં દૂત ઉભેલો જોયો, જેણે મને કહ્યું કે, જોપ્પામાં [માણસ] મોકલી સીમોન જેનું બીજું નામ પીતર છે, તેને તેડાવ;

¹⁴ તે તને એવી વાતો કહેશે કે તેથી તું તારા આખા ઘરનાં સુદ્ધાં તારણ પામશે.

¹⁵ ને હું બોલવા લાગ્યો કે તરત જેમ આપણા પર પવિત્ર આત્મા ઉતર્યો હતો, તેમ તેઓ પર પણ તે ઉતર્યો.

¹⁶ ત્યારે પ્રભુની કહેલી વાત મને યાદ આવી કે, યોહાને પાણીએ બાપ્તિસમાં કીધું ખરૂં, પણ તમે પવિત્ર આત્માએ બાપ્તિસમાં પામશો.

¹⁷ એ માટે જ્યારે આપણે પ્રભુ ઇસુ ખ્રિસ્ત પર વિશ્વાસ કીધો ત્યારે આપણને જેવું દાન મળ્યું તેવુજ દાન દેવે તેઓને પણ આપ્યું, તો હું કોણ હતો, કે દેવને અટકાવું?

¹⁸ ને તેઓ આ વાતો સાંભળીને ચાના રહ્યા, ને દેવને મહિમા આપતા કહ્યું કે, દેવે વિદેશીઓને પણ પશ્ચાતાપ [કરવાનું મન] આપ્યું છે કે તેઓ જીવન પામે.

¹⁹ અને સ્તેફનના સબંધમાં જે સતાવણી થઇ તેથી જેઓ વિખેરાઈ ગયા હતા તેઓ ફેનીકે તથા કુપરસ તથા અંત્યોખ લગી ગયા, પણ તેઓએ યહુદીઓ વગર કોઈને વા પ્રગટ કીધી ન હતી.

²⁰ પણ તેઓમાંના કેટલાક કુપરસ તથા કુરેનીના માણસો હતા, તેઓએ અંત્યોખ આવીને હેલેનીઓની આગળ પણ પ્રભુ વિષેની સુવાર્તા કહી સંભળાવી.

²¹ અને પ્રભુની હાથ તેઓની સાથે હતો, ને ઘણા વિશ્વાસ કરીને પ્રભુ તરફ વળ્યા.

²² અને તેઓ વિષેના સમાચાર યરુશાલેમની મંડળીને કાને આવ્યા; અને તેઓએ બર્નાબાસને અંત્યોખ લગી મોકાયો;

²³ ને ત્યાં આવ્યો, ત્યારે દેવની કૃપા જોઇને આંનદ પામ્યો; ને તેણે તેઓ સર્વને મનના નિશ્ચયથી પ્રભુને વળગી રેહ્વાનો બોધ કીધો;

²⁴ કેમકે તે સારો માણસ હતો, ને પવિત્ર આત્માથી તથા વિશ્વાસથી ભરપુર હતો, ને ઘણા લોક પ્રભુની [મંડળીમાં] ઉમેરાયા.

²⁵ અને [બર્નાબાસ] શાઉલની શોધ કરવા સારૂ તાર્સસ ગયો;

²⁶ અને તે મળ્યો ત્યારે તે તેને અંત્યોખમાં લાવ્યો. અને એમ થયું કે, તેઓએ એક આખું વરસ મંડળીની સાથે એકઠા મળીને ઘણા લોકોને બોધ કીધો; ને શિષ્યો પહેલવહેલાં અંત્યોખમાં ખ્રીસ્તી કહેવાયા.

²⁷ હવે એ દિવસોમાં ભવિષ્યવાદીઓ યરુશાલેમથી અંત્યોખ આવ્યા.

²⁸ અને તેઓમાંના અગાબસ નામે એક ઉભો થઈને આત્માંવડે સુચવ્યું કે, આખા જગતમાં મોટો દુકાળ પડશે; અને કલાદીઅસના દિવસોમાં તેમજ થયું.

²⁹ ત્યારે શિષ્યોએ ઠરાવ્યું કે, આપણે ડાર્ક માણસે પોતપોતાની શક્તિ પ્રમાણે યહુદાહમાં રહેનાર ભાઈઓને કંઈ મદદ મોકલવી.

³⁰ અને તેઓએ તેમ કીધું, ને બર્નાબાસ તથા શાઉલની હસ્તક વડીલો પર તે મોકલી.