² અને ગિલઆદની સ્ત્રીની પેટે તેને દીકરા થયા; ને તેની સ્ત્રીના દીકરા મોટા થયા ત્યારે તેઓએ યિફતાહને કાઢી મુકતાં તેને કહ્યું, અમારા બાપના ઘરમાં તને કંઈ વતન મળશે નહિ; કેમકે તું બીજી સ્ત્રીનો દીકરો છે.

³ ત્યારે યિફતાહ પોતાના ભાઈઓ પાસેથી નાસી જઈને ટોબ દેશમાં રહ્યો; ને કેટલાએક હલકા લોક યિફતાહની પાસે ભેગા થઈને તેની સાથે નિકળી ગયા.

⁴ અને કેટલાક વખત પછી એમ થયું કે, આમ્મોનપુત્રોએ ઇસ્રાએલની સામે યુદ્ધ કીધું.

⁵ આને એમ થયું કે, આમ્મોનપુત્રો ઇસ્રાએલની સામે યુદ્ધ કરતાં હતા ત્યારે ગિલઆદના વડીલો યિફતાહને ટોબ દેશથી તેડી લાવવા સારૂ ગયા.

⁶ અને તેઓએ યિફતાહને કહ્યું કે, આવીને અમારો સેનાપતિ થા, કે અમે આમ્મોનપુત્રોની સામે લડીએ.

⁷ અને યિફતાહે ગિલઆદના વડીલોને કહ્યું કે, તમે શું મને ધિક્કાર્યો નહોતો? ને મારા બાપના ઘરમાંથી શું મને કાઢી મુક્યો ન હતો? ને હવે સંકટમાં તમે આવી પડ્યા ત્યારે કેમ મારી પાસે આવ્યા છો?

⁸ આને ગિલઆદના વડીલોએ યિફતાહને કહ્યું, હાલ એ માટે અમે તારી પાસે પાછા આવ્યા છીએ, કે તું અમારી સાથે આવે, ને આમ્મોનપુત્રોની સાથે લડે, તો તું ગિલઆદના સર્વ રહેનારા પર અમારો સરદાર થશે.

⁹ અને યિફતાહે ગિલઆદના વડીલોને કહ્યું, જો આમ્મોનપુત્રોની સામે યુદ્ધ કરવાને તમે મને સ્વદેશ લઇ જાઓ, ને જો યહોવાહ તેઓને મારી આગળથી હરાવે, તો શું હું તમારો સરદાર થાઉં?

¹⁰ ને ગિલઆદના વડીલોએ યિફતાહને કહ્યું કે, યહોવાહ આપણી વચ્ચમાં સાક્ષી થાઓ કે ખચિત તારા કહેવા પ્રમાણેજ અમે કરીશું.

¹¹ અને યિફતાહ ગિલઆદના વડીલોની સાથે ગયો, ને લોકોએ તેને પોતાનો સરદાર તથા સેનાપતિ ઠરાવ્યો; ને યિફતાહે પોતાની સર્વ વાતો મિસ્પાહમાં આગળ કહી.

¹² અને યિફતાહે આમ્મોનપુત્રોના રાજાની પાસે સંદેશીઆ મોકલીને કહેવડાવ્યું કે, મારે ને તારે શું છે કે મારા દેશની વિરુદ્ધ લડવાને તું મારી પાસે આવ્યો છે?

¹³ ને આમ્મોનપુત્રોના રાજાએ યિફતાહના સંદેશીઆઓને ઉત્તર આપ્યો કે, જયારે ઇસ્રાએલ મિસરમાંથી આવતા હતા, ત્યારે આર્નોનથી યાબ્બોક તથા યરદન સુધી તેઓએ મારો દેશ લઇ લીધો હતો; એ માટે હવે શાંતિથી તે પાછો આપ.

¹⁴ અને યિફતાહ આમ્મોનપુત્રોના રાજાની પાસે ફરી સંદેશીઅ મોકલ્યા;

¹⁵ અને તેણે તેને કહેવડાવ્યું કે, યિફતાહ એમ કહે છે કે, મોઆબનો દેશ તથા આમ્મોનપુત્રોનો દેશ ઇસ્રાએલે લઇ લીધો નહોતો;

¹⁶ પણ જયારે ઇસ્રાએલ મિસરમાંથી આવ્યા, ને લાલ સમુદ્ર લગી અરણ્યની એક બાજુથી બીજી બાજુ સુધી ફરીને કાદેશમાં પહોંચ્યા;

¹⁷ ત્યારે ઇસ્રાએલે અદોમના રાજા પાસે સંદેશીઆ મોકલીને કહેવડાવ્યું કે, કૃપા કરીને તારા દેશમાં થઈને મને જવા દે; પણ અદોમના રાજાએ તેનું સાંભળ્યું નહિ. અને તેજ પ્રમાણે તેણે મોઆબના રાજાને કહેવડાવ્યું; પણ તે પણ એમ કરવા ચાહતો નહોતો; ને ઇસ્રાએલ કાદેશમાં રહ્યા.

¹⁸ ત્યાર પછી અરણ્યમાં થઈને ચાલ્યા, ને અદોમ દેશ તથા મોઆબ દેશની સરહદ ઉપર ચકરાવો ખાઈને, મોઆબ દેશની પૂર્વ બાજુએ ફરી આવીને, આર્નોનને પેલે પાર તેઓએ છાવણી કરી; પણ મોઆબની સરહદની અંદર આવ્યો નહોતો, કેમકે મોઆબની સરહદ અર્નોન હતી.

¹⁹ અને ઇસ્રાએલે અમોરીઓના રાજા સીહોનની, એટલે હેશ્બોનના રાજાની પાસે સંદેશીઆ મોકલ્યા; ને ઇસ્રાએલે તેને કહેવડાવ્યું કે, અમે તારી વિનંતી કરીએ છીએ કે તારા દેશમાં થઈને અમને અમારી જગ્યાએ જવા દે.

²⁰ પણ પોતાની સરહદમાં થઈને તેમને જવા દે એટલો સીહોનને ઇસ્રાએલનો ભરોસો નહોતો; પણ સીહોને પોતાના સર્વ લોકોને એકઠા કરીને યાહાસમાં છાવણી કરી, ને ઇસ્રાએલની સામે યુદ્ધ કર્યું.

²¹ અને ઇસ્રાએલના દેવ યહોવાહે સીહોનને તથા તેના સર્વ લોકોને ઇસ્રાએલના હાથમાં સોંપ્યાં, ને તેઓએ તેઓનો સંહાર કીધો; એમ ઇસ્રાએલે તે દેશના રહેનારા અમોરીઓના સર્વ દેશનું વતન પ્રાપ્ત કીધું.

²² અને અર્નોનથી તે યાબ્બોક સુધી, તથા અરણ્યથી તે યરદન સુધી, અમ્રીઓની સર્વ સીમનું તેઓએ વતન પ્રાપ્ત કીધું.

²³ એમ ઇસ્રાએલના દેવ યહોવાહે પોતાના લોક ઇસ્રાએલની આગળથી અમોરીઓને વતનહિન કીધા છે, ને શું તું તેઓનું વતન લઇશ?

²⁴ તારો દેવ કમોશ જે વતન તને આપે છે, તે વતન શું તું નહિ લેશે? તેમ અમારા દેવ યહોવાહે જેઓને અમારી આગળથી વતનહિન કીધા છે, તેઓનું વતન અમે લઈશું.

²⁵ અને હવે શું, તું સિપ્પોરના દીકરા મોઆબના રાજા બાલાક કરતાં શ્રેષ્ઠ છે? શું તેણે ઇસ્રાએલની સામે કદી ટક્કર લીધી? કે તેઓની સામે તેણે કદી યુદ્ધ કીધું?

²⁶ ઇસ્રાએલ હેશ્બોનમાં તથા તેના ગામોમાં, ને અરોએરમાં તથા તેના ગામોમાં, તથા અર્નોનના કાંઠા ઉપરના સઘળાં નગરમાં, ત્રણસેં વર્ષ લગી રહેતા હતા, તો તે દરમિયાનમાં તમે કેમ તે પાછાં ન લીધાં?

²⁷ માટે મેં તારો અપરાધ કીધો નથી, પણ તું મારી સામે યુદ્ધ કરવાથી મારો અન્યાય કરે છે; ઇસ્રાએલપુત્રો તથા આમ્મોનપુત્રોની વચ્ચે આજ ન્યાયાધીશ યહોવાહ ન્યાય કરો.

²⁸ તો પણ યિફતાહ જે સંદેશો આમ્મોનપુત્રોના રાજાને કહેવડાવ્યો હતો તે તેણે કાન પર લીધો નહિ.

²⁹ ત્યારે યહોવાહનો આત્મા યિફતાહ પર આવ્યો, ને તે ગિલઆદ તથા મનાશ્શેહમાંથી આમ્મોનપુત્રોની પાસે ગયો.

³⁰ અને યિફતાહે યહોવાહની આગળ માનતા માનીને કહ્યું, જો તું આમ્મોનપુત્રોને મારા હાથમાં જરૂર સોંપશે,

³¹ તો એમ થશે કે, હું સલાહ કરીને આમ્મોનપુત્રો પાસેથી જયારે શાંતિએ પાછો આવીશ, ત્યારે મને મળવા સારૂ જે કોઇ મારા ઘરનાં બારણામાંથી બહાર નિકળે તે યહોવાહનું થશે, અને હું તેને દહનીયાર્પણ કરીશ.

³² એમ આમ્મોનપુત્રોની સામે યુદ્ધ કરવા સારૂ યિફતાહ તેઓની પાસે ગયો; ને યહોવાહે તેઓને તેના હાથમાં સોંપ્યો.

³³ અને તેણે અરોએરથી મિન્નીથ સુધીનાઓનો, એટલે વીસ નગરોનો, તથા આબેલ-કરામીમ સુધીનાઓનો, મોટો સંહાર કીધો. એમ ઇસ્રાએલપુત્રોની આગળ આમ્મોનપુત્રો હાર્યો.

³⁴ ને યિફતાહ પોતાને ઘેર મિસ્પાહમાં આવ્યો, ને, જુઓ, તેની દીકરી દફ તથા નૃત્ય સહિત તેને મળવા સારૂ બહાર આવી; ને તે તેની એકનીએક દીકરી હતી; તે વિના તેને દીકરો કે દીકરી કાઈ ન હતું.

³⁵ અને તેણે તેને દીઠી, ત્યારે એમ થયું કે તેણે પોતાના વસ્ત્ર ફાડ્યાં, ને કહ્યું, હાય, મારી દીકરી! તે મને બહુ નમાવ્યો છે, ને મને દુઃખ દેનારામાંની એક તું છે; કેમકે યહોવાહની આગળ મેં મારૂં મુખ ઉઘાડ્યું છે, ને મારાથી પાછુ ફરાય નહિ.

³⁶ અને તેણીએ તેને કહ્યું, મારા બાપ, તેં યહોવાહની આગળ મુખ ઉઘાડ્યું છે; તો તારા મુખમાંથી જે નિકળ્યું હોય તે પ્રમાણે મને કર; કેમકે યહોવાહે તારૂં વેર તારા વેરીઓ પર, એટલે આમ્મોનપુત્રો પર વાળ્યું છે.

³⁷ અને તેણીએ પોતાના બાપને કહ્યું, મારે સારૂ આટલે થવા દે, કે મને બે મહિના સુધી રહેવા દે, હું પોતાની સહિયરો સાથે પર્વતો પર જઈને ફરૂ, ને પોતાના કુંવારાપણાનો શોક કરૂં.

³⁸ અને તેણે કહ્યું જા, અંને બે મહિના સુધી તેણે તેને વિદાય કીધી, ને તેણીએ પોતાની સહિયરો સાથે જઈને પર્વતો ઉપર પોતાના કુંવારાપણાનો શોક કર્યો.

³⁹ અને બે મહિના ગયા પછી એમ થયું કે, તે પોતાના બાપની પાસે પાછા આવી, ને તેણે પોતાની માનેલી માનતા પ્રમાણે તેને કર્યું; ને તેણીએ પુરૂષનો અનુભવ કીધો ન હતો. અને ઇસ્રાએલમાં એવો રિવાજ પડ્યો કે,

⁴⁰ વર્ષમાં ચાર દિવસ સુધી ગિલઆદી યિફતાહની દીકરીનો શોક પાળવાને સારૂ ઇસ્રાએલપુત્રીઓ દર વર્ષે જતી હતી.