¹ અને ઇબ્રામ પોતાની સ્ત્રીને લઈને સર્વ માલમિલકત સુદ્ધાં મીસરમાંથી નેગેબ ભણી ગયો અને લોટ તેની સાથે ગયો.

² અને ઇબ્રામ પાસે ઢોર તથા રૂપું તથા સોનું ઘણું હોવાથી તે બહુ ધનવાન હતો.

³ અને તે નેગેબથી આગળ ચાલતા બેથેલ ગયો, એટલે બેથેલ તથા આયની વચ્ચે જ્યાં પહેલવહેલાં તેનો તંબુ હતો [ત્યાં ગયો].

⁴ અને જે ઠેકાણે તેણે પહેલા વેદી બાંધી હતી, ત્યાં લગી તે ગયો; ને ત્યાં ઇબ્રામે યહોવાહને નામે પ્રાર્થના કીધી.

⁵ અને ઇબ્રામની સાથે લોટ ચાલતો હતો, તેને પણ ઘેટાં તથા ઢોર તથા તંબુ હતા.

⁶ અને તે દેશ એવો ફળરૂપ ન હતો કે તેઓ ભેગા રહે, કેમકે તેઓની સંપત્તિ એટલી હતી, કે તેઓ એકઠા રહી ના શકે.

⁷ અને ઇબ્રામના ગોવાળિયાઓ તથા લોટના ગોવાળિયાઓની વચ્ચે તકરાર થઇ, અને તે વક્ખતે કનાની તથા પરિઝી તે દેશમાં રેહતા.

⁸ અને ઇબ્રામે લોટને કહ્યું કે, હવે મારી ને તારી વચ્ચે ને મારા તથા તારા ગોવાળિયાઓ વચ્ચે તકરાર ન થવી જોઈએ; કેમકે આપણે ભાઈઓ છીએ.

⁹ શું, તારી આગળ આંખો દેશ નથી? તો મારાથી તું જુદો થા; જો તું ડાબી ગમ જશે, તો હું જમણી ગમ જઈશ; ને જો તું જમણી ગમ જશે, તો હું ડાબી ગમ જઈશ.

¹⁰ ત્યારે લોટે પોતાની આંખો ઉંચી કરીને યાર્દાનનો આખો પ્રદેશ સોઆર લગી જોયો કે તેમાં બધે પાણી પુષ્કળ છે; કેમકે યહોવાહે સદોમ તથા ગમોરાહનો નાશ કર્યા અગાઉ તે દેશ તો યહોવાહની વાડીના જેવા તથા મિસર દેશનાં જેવા હતો.

¹¹ ત્યારે લોટે પોતાને સારું યાર્દનનો આંખો પ્રદેશ પસંદ કરો, ને લોટ પુર્વગમ ગયો; ને તેઓ એક બીજાથી જુદા થયાં.

¹² ઇબ્રામ કનાન દેશમાં રહ્યો, ને લોટ તે પ્રદેશના નગરોમાં રહ્યો, ને સદોમ સુધી તે તંબુમાં મુકામ કરતો કરતો ગયો.

¹³ પણ સદોમના માણસો યહોવાહને વિરુદ્ધ અતિ દુષ્ટ તથા પાપી હતા.

¹⁴ અને ઇબ્રામથી લોટ જુદો થયાં પછી યહોવાહે ઇબ્રામને કહ્યું કે, તું પોતાની આંખો ઉંચી કરીને તું જ્યાં છે ત્યાંથી ઉત્તર તથા દક્ષિણ તથા પૂર્વ તથા પશ્ચિમ ભણી જો.

¹⁵ કેમકે જે દેશ તું જુએ છે, તે બધો હું તને તથા તારા વંશને સદાને માટે આપીશ.

¹⁶ અને હું તારો વંશ પૃથ્વીની રાજના જેટલો કરીશ; એવો કે જો કોઈ પૃથ્વીની રજને ગણી શકે તો તારો વંશ પણ ગણાય.

¹⁷ ઉઠ, આ દેશની લંબાઈ તથા પહોળાઈની હદ સુધી ફર, કેમકે તે હું તને આપીશ.

¹⁸ ત્યારે ઇબ્રામ પોતાનો તંબુ પાડીને મામરેના એલોન વૃક્ષો જે હેબ્રોનમાં છે તેઓ તળે આવીને રહ્યો, ને ત્યાં યહોવાહને સારું તેણે એક વેદી બાંધી.