¹ અને દાઉદને યહોવાહે તેના સઘળા શત્રુઓના હાથથી તથા શાઉલના હાથથી છોડાવ્યો, તે દિવસે તે આ ગીતના શબ્દો યહોવાહની આગળ બોલ્યો;

² ને તેણે કહ્યું કે, યહોવાહ મારો ખડક, તથા મારો કિલ્લો, તથા મારો બચાવનાર છે, હા, મારો છે;

³ મારા ખડકનો દેવ, હું તેના પર ભરોસો રાખીશ; તે મારૂં બખ્તર તથા મારા તારણનું શિંગ, મારો ઉંચો બુરૂજ, તથા મારૂં આશ્રયસ્થાન છે; હે મારા ત્રાતા, તું મને બળાત્કારથી બચાવે છે.

⁴ યહોવાહ જે સ્તુતિપાત્ર છે, તેને હું હાંક મારીશ; એમ હું મારા શત્રુઓથી બચી જઈશ.

⁵ કેમકે મૃત્યુના મોજાઓએ મને ઘેર્યો, દુષ્ટપણાની રેલાએ મને બીવડાવ્યો.

⁶ શેઓલના બંધનોએ મને ઘેરો ઘાલ્યો; મરણના પાસા મારા ઉપર આવી પડ્યા.

⁷ મારા સંકટમાં મેં યહોવાહને વિનંતી કીધી; હા, મારા દેવનું મેં સંબોધન કીધું, ને તેણે પોતાના પવિત્રસ્થાનમાંથી મારો ઘાટો સાંભળ્યો, ને મારી હાંક તેને કાને પહોંચી.

⁸ ત્યારે પૃથ્વી હાલી તથા કાંપી, આકાશના પાયા ખસી ગયા, તથા હાલ્યા, કારણ કે તે રોષિત હતો.

⁹ તેના નસકારોમાંથી ધુમાડો ચઢયો, ને તેના મુખમાંથી ખાઇ જનાર અગ્નિ નિકળ્યો, તેથી અંગારા સળગી ઉઠ્યા.

¹⁰ વળી તે આકાશોને નમાવીને ઉતર્યો; ને તેના પગ તળે ઘોર અંધકાર હતો.

¹¹ અને તે કરૂબ ઉપર સ્વારી કરીને ઉડ્યો; હા, વાયુની પાંખો પર તે દેખાયો.

¹² અને તેણે અંધકારને, પાણીના ઢગલાને, તથા આકાશના ઘાડા મેઘોને પોતાની આસપાસ આચ્છાદન બનાવ્યું.

¹³ તેની સામેના પ્રકાશથી અગ્નિના અંગારા સળગી ઉઠ્યા.

¹⁴ આકાશથી યહોવાહે ગર્જના કીધી, ને પરત્પરે પોતાનો ઘાંટો કાઢ્યો,

¹⁵ ને તેણે બાણો મારીને તેઓને વિખેરી નાખ્યા; વિજળી મોકલીને તેઓને થથરાવી નાખ્યા.

¹⁶ ત્યારે યહોવાહની ધમકીથી, તથા તેનાં નસકોરાંના શ્વાસના ઝપાટાથી સમુદ્રનાં તળિયાં દેખાયાં, જગતના પાયા ઉઘાડા થયા.

¹⁷ તેણે ઉપરથી મોકલીને મને ઝાલી લીધો, તેણે ઘણા પાણીઓમાંથી મને કાઢ્યો.

¹⁸ તેણે મારા બળવાન શત્રુથી, મારા દ્વેષકોથી મને બચાવ્યો, કેમકે તેઓ મારા કરતાં જોરાવર હતા.

¹⁹ મારી વિપત્તિને દિવસે તેઓ મારા પર તુટી પડ્યા, પણ યહોવાહ મારો આધાર હતો.

²⁰ વળી તે મને ખુલ્લી જગ્યામાં કાઢી લાવ્યો; તેણે મને છોડાવ્યો, કેમકે તે મારા પર પ્રસન્ન હતો.

²¹ યહોવાહે મારા ન્યાયીપણા પ્રમાણે મને પ્રતિદાન આપ્યું; તેણે મારા હાથની શુદ્ધતા પ્રમાણે મને બદલો આપ્યો છે.

²² કેમકે મેં યહોવાહના માર્ગ પાળ્યા છે, ને મારા દેવથી ભુંડાઇ કરીને હું હઠી ગયો નથી.

²³ કેમકે તેના સર્વ ન્યાયકૃત્યો મારી સમ્મુખ હતાં; ને તેના વિધિઓથી હું નિરાળો થયો નથી.

²⁴ વળી હું તેની પ્રત્યે પૂર્ણ હતો, ને મેં મારા અન્યાયથી પોતાને સંભાળ્યો.

²⁵ એ માટે યહોવાહે મારા ન્યાયીપણા પ્રમાણે, તથા તેની નજરમાં મારી શુદ્ધતા પ્રમાણે મને પ્રતિદાન દીધું છે.

²⁶ કૃપાળુંની સાથે તું કૃપાળુ દેખાઈશ, ને પૂર્ણ માણસની સાથે તું પૂર્ણ દેખાઈશ.

²⁷ શુદ્ધની સાથે તું શુદ્ધ દેખાઈશ; ને હઠીલાની સાથે તું હઠીલો દેખાઈશ.

²⁸ અને દુઃખીતોને તું બચાવીશ, પણ ગર્વિષ્ઠો પર તારી દૃષ્ટી છે, એ સારૂ કે તું તેઓને નમાવે.

²⁹ કેમકે, હે યહોવાહ, તું મારો દીવો છે, ને યહોવાહ મારા અંધકારને પ્રકાશિત કરશે.

³⁰ કેમકે તારાથી હું પલટણ ઉપર ઘસી પડું, મારા દેવથી હું કોટ કુદી જાઉં છું.

³¹ દેવનો માર્ગ તો પૂર્ણ છે, યહોવાહનો શબ્દ પરખેલો છે; જે સઘળા તેના પર ભરોસો રાખે છે તેઓની ઢાલ તે છે.

³² કેમકે યહોવાહ વિના દેવ કોણ છે? ને અમારા દેવ વિના ગઢ કોણ છે?

³³ દેવ મારો મજબૂત ગઢ છે, ને તે નીતિસંપન્ન માણસને તેના માર્ગમાં દોરે છે.

³⁴ તે તેના પગને હરણીના પગ જેવા કરે છે, ને મારાં ઉંચસ્થાનો પર મને સ્થાપે છે.

³⁵ તે મારા હાથોને લડતાં શિખવે છે; તેથી મારા ભુજ પિત્તળનું ધનુષ્ય તાણે છે.

³⁶ વળી તેં તારા તારણની ઢાલ મને આપે છે; ને તારી નિધેહબાનીએ મને મોટો કીધો છે.

³⁷ તેં મારાં પગલાં હેઠળ જગ્યા ખુલ્લી કરી છે, ને મારા પગ સરકી ગયા નથી.

³⁸ મેં મારા શત્રુઓની પૂઠે લાગીને તેઓનો વિનાશ કીધો છે; ને તેઓનો નાશ થયો ત્યાં સુધી હું પાછો ફર્યો નહિ.

³⁹ અને મેં તેઓનો સંહાર કીધો છે, તથા તેઓનો એવી વિંધી નાખ્યા છે, કે તેઓ ઉઠી ન શકે; હા, તેઓ મારા પગ તળે પડ્યા છે.

⁴⁰ કેમકે તેં યુદ્ધને સારૂ મારી કમરે સામર્થ્ય બાંધ્યું છે; મારી સામે ચઢનારાને તેં મારે તાબે કીધા છે;

⁴¹ વળી તેં મારા શત્રુની પીઠ મારા તરફ ફેરવાવી છે; કે મારા દ્વેષકોનો હું નાશ કરૂં.

⁴² તેઓએ જોયું, પણ બચાવનાર કોઇ નહોતો; વળી યહોવાહની વિનંતી કીધી, પણ તેણે તેઓને ઉત્તર આપ્યો નહિ.

⁴³ ત્યારે મેં તેઓને ખાંડીને ભૂમિની ધૂળ જેવા બારીક કર્યા, તેઓને રસ્તાના કાદવની પેઠે ખુંધા, ને તેઓને ચોગમ વિખેરી નાખ્યા.

⁴⁴ વળી મારા લોકના વિવાદોથી તેં મને છોડાવ્યો છે, વિદેશીઓનો ઉપરી થવા સારૂ તેં મને સંભાળી રાખ્યો છે; જે લોકોને હું ઓળખતો નથી તેઓ મારી તાબેદારી કરશે.

⁴⁵ પારકા લોક ઢોંગથી મારે શરણ થશે, મારા વિષે સાંભળતાંજ તેઓ મારૂં માનશે.

⁴⁶ પારકા લોકનો ક્ષય થશે, ને તેઓ પોતાના કિલ્લાઓમાંથી ધ્રુજતા આવશે.

⁴⁷ યહોવાહ જીવે છે; ને મારા ખડકને ધન્ય હો; ને મારા તારણરૂપી ખડકનો દેવ ઉત્તમ મનાઓ;

⁴⁸ એટલે જે દેવ મારૂં વૈર વાળે છે, ને લોકોને મારા હાથ તળે તાબે કરે છે,

⁴⁹ અને મારા શત્રુઓની પાસેથી મને છોડાવી લાવે છે; હા, મારી સામે ઉઠનારા પર તું મને ઉંચો કરે છે; તું બળાત્કારી માણસથી મને બચાવે છે.

⁵⁰ એ માટે વિદેશીઓ મધ્યે, હે યહોવા, તું તારી ઉપકારસ્તુતિ કરીશ, ને હું તારા નામનાં સ્તોત્ર ગાઈશ.

⁵¹ તે પોતાના રાજાને મોટું તારણ આપે છે, ને પોતાના અભિષિક્ત પર, એટલે દાઉદ તથા તેના સંતાન પર, સદા સર્વકાળ સુધી મહેરબાની રાખે છે.